نهار 14 ديسمبر 2012 تنشرت "مسودة مشروع الدستور". تنجموا تلقاوها هنا. هي، الحق، فيها برشة نقائص شكلا و مضمونا. و برشة عباد تكلمت على هالنقائص (مثلا هنا).
أنا، من موقعي، بش نتكلم على حاجة بركة و نركز عليها.
كيف ما رينا العامين هذومة كثر الكلام على زيادات شهاري جماعة المجلس التأسيسي. أنا نشوف و أنو لازم نسكروا باب البلاء هذايا فرد مرة. و عندي إقتراح و هو إدراج هذا الفصل في الدستور:
كل تغيير في الموارد الماديّة لأعضاء مجلس الشّعب لا يدخل حيّز التنفيذ إلّا في الفترة النيابيّة الموالية
يمكن ياسر و أنو الصياغة متوسطة و الثغرات موجودة. هذاكة علاش نطلب منكم بش تعاونوني باقتراحاتكم.
نفسرلكم شنوة نطلب من النص هذا:
- النواب كان بش يزيدو في الشهرية، ما يزيدوش لرواحهم و لكن للي مبعدهم
- لا يزيدوا لا في الشهرية، و لا في الفوائد العينية، و لا في الشيخوخة، و لا أي حاجة من النوع هذا. معنتها موش نسكروها من جيهة، يهزوا الفلوس من الجيهة الأخرى
- ينجموا يزيدوا في حاجات الخدمة. مثلا يبدلوا الكراسي، يزيدوا شهاري اللي يخدموا غادي،... معنتها التسكير على الشهاري موش على ميزانية المجلس
إذا كان عندك أي ملاحظة، تكونشي حتى نزيد فاصل، حط تعليق اللوطة.
تحب تكتب إسمك ولا لا، أمورك.
تحب تعبر بالدارجة، بالعربية، بالسوري، بالأنغليز، بالشنوة،... أمورك.
المهم، حط فكرتك إذا كانك مقتنع و أنو الفصل هذا عندو بلاصة في دستور الجمهورية التونسية.
